SATSE Euskadik ohartarazi du tenperatura altuek berriro arriskuan jartzen dutela osasun-langileen lan-osasuna

Beste uda batez, Erizaintza Sindikatuak, SATSE Euskadik, autonomia-erkidegoko osasun-zentro askotan tenperatura altuek dakartzaten arriskuak salatzen ditu berriro, orain arte egiturazko konponbide eraginkorrik hartu gabe.

"Ez gara deserosotasunaz bakarrik ari: langileen osasunerako eta pazienteei ematen zaien arretaren segurtasunerako benetako arriskuez ari gara", ohartarazi du sindikatuko Lan Osasuneko arduradun autonomiko Marivi Mollinedok.

Araban, SATSEk ohartarazi du gehiegizko tenperaturak daudela Aranbizkarra 1 Osasun Zentroko kontsultetan, Gasteizen. "Onartezina da profesionalek baldintza horiek lanaldi osoan jasan behar izatea", salatu du Mollinedok.

Gipuzkoan, egoera bereziki kezkagarria da Donostia Unibertsitate Ospitalean. Bertan, kexak jaso dira hainbat ospitalizazio-solairutatik (3., 4. eta 5. mailak), hegoaldera bideratutako geletan, eta baita laguntza bidezko ugalketa-zerbitzutik ere. "Prebentziotik jarraipena egiten ari dira, baina kontua da baldintzak kezkagarriak direla", azaldu du arduradun sindikalak.

Bizkaian, arazoak hainbat ESItan daude. Bilboko ESIan, Bombero Etxaniz anbulatorioko fisioterapia zerbitzuak hilabeteak daramatza konponbide baten zain, baimendutakoa baino tenperatura altuagoak erregistratu ondoren. Klimatizazio-gailu eramangarriak eskatu diren arren, "erantzunik gabe jarraitzen dugu, eta jarduten ez bada, Lan Ikuskaritzara eramango dugu", ohartarazi du Mollinedok.

Basurtuko Ospitalean, oraingoz gorabehera larririk detektatu ez bada ere, SATSEk gogorarazi du iazko udan arau-mugak nabarmen gainditu zirela erditzeen eremuan, esaterako. Gainera, Ezkerraldea-Enkarterri-Gurutzetako ESIan,Repelegako osasun-zentroko kontsultetan eta gaixo infekziosoak artatzen dituen ospitaleko 12. solairuan izandako arazoen berri eman da.

Azkenik, Barrualde ESIan, aurten oraindik gorabehera formalik jakinarazi ez bada ere, SATSEk azpimarratzen du Basauriko edo Etxebarriko EAGak bezalako zentroek antzeko egoerak izaten dituztela udan, eta modu prekarioan konpontzen direla haizagailuekin.

Eskakizun argia: klimatizazioan eta mantentze-lanetan inbertitzea

SATSE Euskadik premiaz jardutea eskatzen du. "Adabakiak jartzeari uzteko eta azpiegituretan, klimatizazioan eta mantentze-lanetan inbertitzeko eskatzen dugu. Ezin da horrela lan egin. Baldintza termikoek eragin zuzena dute laneko osasunean, baina baita segurtasun klinikoan ere ", azpimarratu du Marivi Mollinedok.

Eta irmotasunez gehitzen du: "Udak ez dira ustekabeko gertaerak. Lan-baldintza duinak bermatzea ez da aukera bat, betebeharra baizik ".

Amaitzeko, sindikatuak ziurtatu du kasu bakoitza monitorizatzen jarraituko duela eta ez duela zalantzarik izango salaketak Lan Ikuskaritzara edo beste instantzia batzuetara bidaltzeko, Osakidetzak eta Osasun Sailak azkar jarduten ez badute.