SATSEk bateragarritasunaren egoerari buruzko negoziazioa eskatzen dio Osakidetzari

SATSE Euskadik formalki eskatu dio Osakidetzari prozedura bat gaitzeko, Erizaintzako eta Fisioterapiako langileek eta gainerako osasun-profesionalek uko egin diezaioten esklusibotasuna ordaintzen duen berariazko osagarriaren zatiari, bigarren jarduera pribatu batean aritzeko bateragarritasuna lortu ahal izateko.

Eskaera hori Osakidetzak bateraezintasunei buruzko 1/2026 Instrukzioa onartu ondoren sortu zen. Tramitazioan zehar, SATSEk Mahai Sektorialean planteatu genuen beharrezkoa zela esklusibotasunari dagokion zenbatekoa ezagutzeko eta horri uko egiteko aukera emango zuen mekanismo bat egituratzea, beste kolektibo profesional batzuekin gertatzen denaren antzera.

Hala ere, Osakidetzaren erantzuna izan zen egungo Esparru Estatutuak aukera hori soilik langile medikuentzat jasotzen duela, eta ezin dela gainerako lanbide-kategorietara zabaldu. SATSEn ez gatoz bat interpretazio horrekin.

Lanbidearen errealitatera egokitutako aldarrikapena

Nahiz eta SATSEk defendatzen jarraitzen duen funtsezko irtenbidea jarduera-aniztasunaren beharra saihestuko duten lan-baldintzak direla, ezin dugu alde batera utzi Euskadiko erizain espezialista askok bizi duten errealitatea.

Eremu jakin batzuetan oraindik ere badirauten behin-behinekotasunak, nahi gabeko partzialtasunak eta prekarietateak lanaldia beste enplegu batzuen bidez osatzera behartzen dituzte profesional asko, bereziki eremu soziosanitarioan eta egoitza-eremuan. Kasu askotan, profesional horiek kontratu partzialak konbinatu behar dituzte lanaldi osoa lortzeko eta baldintza ekonomiko egokiak bermatzeko.

Egoitzetako arreta bermatzeko beharra

SATSEtik ohartarazten dugu, gainera, gai horrek lan-eremua gainditzen duela eta zuzenean eragiten diola baliabide soziosanitarioen erabiltzaileek jasotzen duten arretari. Euskadin, adinekoen eta mendekotasuna duten pertsonen arretaren zati handi bat egoitza itundu edo pribatuen bidez ematen da, eta horietan osasun-langileak egotea ezinbestekoa da zainketa seguruak eta kalitatezkoak bermatzeko.

Erizain, fisioterapeuta eta erizain espezialistek bi jarduerak bateragarri egitea eragozteak zaildu egiten du lanpostu horiek betetzea, eta arriskuan jar dezake gure gizarteko pertsona ahulenetako batzuen arreta.

Osakidetzak BAI arautu dezake aukera hori

Era berean, gure ustez, Osakidetzak gai honetan duen posizio juridikoa ez da zuzena; izan ere, Esparru Estatutuak ez du inola ere eragozten osasun-langileek esklusibotasuna ordaintzen duen berariazko osagarriaren zatiari uko egiteko mekanismoak ezartzea.

Osasun-zerbitzu bakoitzak osasun-lizentziadunek uko egiteko xedapen egokiak ezarri behar dituela baino ez du adierazi, baina ez du eragozten gainerako langileei uko egitea. Izan ere, 2022ko Euskal Enplegu Publikoaren Legeak Osakidetzari eskatzen dio gainerako osasun-langileei aplikatzeko mekanismoak ezar ditzan. Horregatik, Osakidetzari eskatu diogu negoziazio-prozesu bat irekitzeko mahai sektorialean, aukera hori gauzatzeko behar diren kasuak, betekizunak, ondorioak eta prozedurak argi eta garbi zehaztu ahal izateko.

SATSE Euskadin erizain, fisioterapeuta eta erizain espezialisten lan-baldintzak hobetzen lagunduko duten neurri guztiak bultzatzen jarraituko dugu, bai eta Osakidetzaren antolaketa-erabakiak gure osasun-sistemako asistentzia- eta lanbide-errealitatera egokituko direla bermatzen ere.

Arlo honetan egiten den edozein aurrerapenen berri ematen jarraituko dugu!