Ekintza Sindikala
Gernika Ospitalea
SATSEk Gernikako Ospitaleko langile falta larria salatu du
Sindikatuak nabarmendu duenez, laguntza-eskaera gero eta handiagoa denez, profesional horiek bereizketa-gunea eta boxak arretarik gabe utzi behar izan dituzte larrialdi bat dagoenean
SATSE Euskadiko Erizaintza Sindikatuak, beste sindikatuekin batera, Gernikako Ospitaleko egoera kezkagarria salatu dute gaur goizean. Izan ere, erizainen eta erizaintzako laguntzaileen falta larriak zerbitzu horren erabiltzaileei kalitatezko asistentzia bermatzea eragotzi die, pazienteen segurtasuna arriskuan jarriz.
Elkarretaratzeetan, sindikatuek nabarmendu dute laguntza-eskaera gero eta handiagoa denez, profesional horiek bereizketa-gunea eta boxak alde batera utzi behar izan dituztela larrialdi bat dagoenean. Langileek larrialdi hori artatzera joan behar dute, bi kokalekuak ikuskatu gabe utziz, eta horrek arriskuan jartzen du gainerako pazienteen segurtasuna. Egoera jasanezin horrek berehalako konponbideak eskatzen ditu.
Gernikako Ospitalearen eta Galdakaokoaren arteko langile-ratioaren aldea arazo kritiko gisa nabarmendu da. Galdakaoko ospitaleko larrialdian plantilla handitu eta premietara egokitu da egituraz, baina Gernikako Larrialdian neurri puntualak eta eskasak hartu dira, hala nola erizain bat kontratatzea eta oporraldian zehar bakarrik laguntzaile bati ordu gehiago ematea.
"Horrek ez du arazoa konpondu, irailetik aurrera zerbitzua arrisku egoerara itzultzen baita", gaineratu du Olatz Kamara SATSE Euskadiko ordezkariak. Gernikako Ospitaleko langileek arazoaren sustraiari heltzen ez dion aldi baterako adabaki gisa hartu dute neurri hori, eta konponbide eraginkor eta iraunkor bat aldarrikatzen jarraitzeko beharra azpimarratu dute.
Kamarak azpimarratu duenez, "egoera honek, gure langileei eragiteaz gain, gaixoen segurtasuna eta arreta ere arriskuan jartzen ditu. Ezin dugu onartu honek jarraitzea ". Hori dela eta, SATSE, ELA, LAB, CCOO, UGT, SAE eta ESK sindikatuek mobilizazioak deitu dituzte egoera horri benetako konponbideak eskatzeko. Gaur goizean bi elkarretaratze egin dira: lehena 10:00etan Gernikako Ospitalearen aurrean, eta bigarrena 11:30ean Gernikako merkatuan.
Sindikatuek "premiazko neurri eraginkorrak hartzeko" eskatu diote zuzendaritzari, "Gernikako Ospitalean langile kopuru egokia bermatzeko, laguntza-eskaera gero eta handiagoari erantzuteko eta triaje eta boxetako segurtasuna urte osoan bermatzeko gai izango dena", amaitu du Olatz Kamarak.