Fisioterapiaren Munduko Eguna: prebentzioa, osasuna eta mugimendua guztiontzat

Gaur, irailak 8, Fisioterapiaren Munduko Eguna ospatzen dugu. Lankideen lana balioesteko data bat da; izan ere, ospitaleetatik, osasun-zentroetatik eta errehabilitazio-zentroetatik egunero lan egiten dute herritarren bizi-kalitatea hobetzeko. Fisioterapiak ez ditu lesioak bakarrik tratatzen, gaixotasunak ere prebenitzen ditu, ohitura osasungarriak sustatzen ditu eta pertsonei laguntzen die bizitzako etapa guztietan, haurtzarotik hasi eta hirugarren adineraino.

Egun hau dela eta, Natalia Gurutzetako Ospitaleko fisioterapeutarekin hitz egin dugu, bertatik bertara jakiteko nola fisioterapiak bizitzak eraldatzen dituen eta zergatik den ezinbestekoa lanbide hau indartzen jarraitzea Osakidetzaren eremu publikoan.

Natalia fisioterapeutari elkarrizketa

Zer zeregin dute gaur egun fisioterapeutek lesioen tratamenduan?

Gure lana uste baino askoz haratago doa. Fisioterapeutek era askotako lesioak dituzten pertsonen bizi-kalitatea hobetzeko lan egiten dugu: kirol-lesioak, kirurgien ondorioak, kalte onkologikoak edo adinarekin lotutako degenerazio-disfuntzioak. Gure helburua ez da soilik funtzioa berreskuratzea, baizik eta paziente bakoitzari laguntzea bizitza aktiboago, autonomoago eta osasuntsuago baterantz.

Osasunaren prebentzioan eta sustapenean ere garrantzitsua al da zure eginkizuna? Adibide zehatzik emango zeniguke?

Dudarik gabe. Osasunaren prebentzioa eta sustapena fisioterapiaren funtsezko oinarriak dira bizitzako etapa guztietan. Haurtzarotik, hazkundearen araberako garapen neuromuskularra eta psikomotorra laguntzen ditugu; nerabezaroan, indarra, erresistentzia eta osasun kardiobaskularra sustatzen ditugu jarduera fisiko indibidual eta kolektiboaren bidez; helduaroan, erditze aurreko, erditze ondoko eta menopausiako etapetan laguntzen diegu emakumeei; eta hirugarren eta laugarren adinekoetan, gaixotasun neurodegeneratiboak, baskularrak edo onkologikoak dituzten pertsonengan esku hartzen dugu, haien autonomia eta ongizatea sustatuz.

Nola hobetu dezakezu pazienteen bizi-kalitatea ariketa terapeutikoaren bidez?

Gizakia mugimendurako diseinatuta dago: indarra, erresistentzia eta elastikotasuna funtsezkoak dira bizitza osoan zehar. Ariketa terapeutikoa funtsezkoa da gure organoak eta burua osasuntsu mantentzeko. Jarduerarik ezak, aldiz, fisikoki zein buruz gaixotzen laguntzen du. Errutina pertsonalizatuak diseinatzen ditugu, gaixotasun kardiobaskularrak, osteoporosia edo diabetesa errehabilitatzeaz gain, bizi-kalitatea modu ukigarrian hobetzen dutenak.

Zure ustez, fisioterapeutek gaur egungoez gain beste gaitasun batzuk garatu ahal izango lituzkete?

Beti dago hobetzeko tartea. Fisioterapiak asko aurreratu du azken hamarkadetan, eta hainbat arlo eta espezialitatetan osasuna eta ikerketa sustatzeko gaitasunak gehitu ditu. Gure eginkizunak zabaltzeak, borondatea ez ezik, erakundeen laguntza ere eskatzen du, gure potentzial guztia herritarren mesedetan hedatu ahal izateko.

Zer beste aldarrikapen dituzte gaur egun fisioterapeuten kolektiboak?

Asko dira. Lehen Mailako Arretan eta Arreta Espezializatuan fisioterapeuten presentzia indartzetik, desgaitasuna duten pertsonentzako ikastetxeak eta eguneko zentroak indartzetik, kalitatezko etengabeko prestakuntza bermatzeraino, unibertsitateko ikerketa eta fundazio publiko eta pribatuetan. Baliabide, unibertsitate-plaza eta politika gehiago behar ditugu, osasun-sistemaren barruan dugun balioa aitortuko dutenak.

Zergatik da garrantzitsua aldarrikapen horien alde borrokatzen jarraitzea?

Oraindik asko dagoelako egiteko. Fisioterapeuten ratio duinak behar ditugu populazioaren arabera, plaza gehiago unibertsitate publikoetan, kalitatezko ikerketa eta irakaskuntzarako funts nahikoak, eta mugikortasun profesionala eta osasun-laguntza mugarik gabe ahalbidetzeko Europako aintzatespena. Horrela bakarrik bermatu ahal izango dugu osasun-zerbitzu publiko sendo, integral eta herritarren benetako beharretara egokitua.

 

"Gaur ospatzen dugu bere lana, baina SATSE Euskadik gogorarazten digu fisioterapia guztion eskura egon behar duen eskubidea dela. Bitartean, fisioterapeutek prebentzioaren, osasunaren eta biztanleriaren bizi-kalitatearen alde lan egiten jarraituko dute, ezinbesteko kolektibo horren ezaugarri den pasio eta konpromisoarekin".