SATSE Euskadik ez du Osasunaren aldeko Ituna sinatu hiru egitura-ildotan desadostasunak daudelako

SATSE Euskadi Erizainen Sindikatuak Osasunaren aldeko Ituna ez sinatzea erabaki du, hainbat hilabetez lan eta inplikazio aktiboa izan ondoren. Egindako ahalegina eta 22 lan-ildotan adituak diren profesionalen parte-hartzea gorabehera, SATSEk uste du dokumentuaren azken planteamenduak eta disentsoen kudeaketak eragotzi egiten dutela itunera oro har atxikitzea.

"Sentitzen dugu erabaki hau hartu behar izatea hainbeste hilabeteko dedikazioaren ondoren, baina ezin dugu babestu oinarrizko egiturazko alderdiekin bat ez gatozen itun bat", adierazi du Amaia Mayor SATSE Euskadiko idazkari nagusiak.

Erakunde sindikalak osasun publikoa hobetzeko konpromisoa berretsi du, baita helburu hori duten foro guztiekin ere. Hala ere, adierazi du ez dagoela ados funtsezko hiru ildo estrategikoekin — langileen politika, zerbitzu-zorroa eta lankidetza publiko-pribatuaren eredua —, Itunaren gainerako ardatzen baldintzatzaile eta erabakigarritzat jotzen baititu.

Disentsua duten hiru ardatz estrategiko

SATSEren kezka handienetako bat langileen politika da. Sindikatuak osasun sistemaren lidergo eta gobernantza eredua eraldatuko duten erreformen beharra defendatu du. Ildo horretan, ezinbestekotzat jotzen du Osakidetzan kudeaketa-funtzioak betetzen dituztenen dedikazio esklusiboa, interes-gatazkak saihesteko.

Herritarrentzako zerbitzuen zorroari dagokionez, SATSEk azpimarratu du haren garapena nagusiki publikoa den kontzepzio batetik abiatu beharko litzatekeela; salaketaren arabera, printzipio hori azken dokumentutik kendu da, lankidetza publiko-pribatuari buruzko atalean jorratzen dela argudiatuz. Hala ere, sindikatuak nabarmendu du beste ildo batzuetan agertzen dela.

Ildo horretan, arlo publiko-pribatuaren arteko lankidetza-eredua izan da prozesuan zehar gehien eztabaidatu den alderdietako bat. SATSEren arabera, itunak ez du berme nahikorik ezartzen gardentasunaren, kontuak ematearen eta erabakiak hartzean interes-gatazkak saihesteko mekanismo eraginkorren arloan.

"Lerro hauen edukiarekin ados ez egoteaz gain, desadostasunak nola kudeatu diren da arazo nagusia, eta horrek eragotzi egiten du Osasunaren aldeko Itunarekin bat egitea", adierazi du Mayorrek.

SATSEk deitoratzen du "euskal osasun-sisteman beharrezkotzat jotzen ditugun egiturazko erreformei ekiteko galdutako aukera. Sistema modu errealean eraldatu nahi bada, ezinbestekoa da benetako aldaketak egitea, oraingo honetan gertatu ez dena ".