SATSEk Transfusio eta Giza Ehunen Euskal Zentroko langileen diskriminazioarekin amaitu du

SATSEk ezin du positiboki baloratu atzo egindako mahai sektoriala. Aztertutako lau puntuetatik, akordio bakarra lortu da: %4ko osagarria, zeinaren bidez azkenean onartzen baita Transfusio eta Giza Ehunen Euskal Zentroko langileen soldata-igoera hilabete honetatik aurrera.

Igoera hori ez zaigu oso eskuzabala iruditzen Osakidetzaren aldetik. Sindikatuak langileen batzarrak berariaz aginduta sinatu du akordio hau, kolektibo horrekin duen konpromisoa betez. Babes hori 31 greba-egunen ostean eman da.

SATSEtik, Transfusio eta Giza Ehunen Euskal Zentroko langileak zoriondu nahi ditugu, bi urte hauetan izandako pertseberantzia eta borrokagatik. Beste behin ere frogatu da langileen borrokak haien lan-baldintzak hobetzen dituela.

Halaber, 2024ko urtarriletik aurrera % 4ko igoera sinatu da Bizkaiko eta Gipuzkoako osasun mentaleko ospitaleez kanpoko sareetako plantillentzat. Langile horiek ere zoriondu nahi ditugu, akordio honek amaiera ematen baitio Arabako sarearekiko jasaten zuten diskriminazioari.

Asteazken honetako mahai sektorialean aztertu den beste gai bat garapen profesionalari eta ebaluazio-eredu berri baten negoziazioari buruzkoa izan da. Gai horren aurrean, SATSE Euskadik urtero karrera profesionaleko ohiko deialdi bat argitaratzeko eskatu dio Osakidetzari. Hori ez da betetzen ari une honetan; izan ere, sindikatu honek behin eta berriz egindako eskakizunen ondoren, 2022. urteari dagokion ohiko deialdia argitaratu berri da, eta ez dugu onartzen langileek ordaintzea atzerapen bidegabe horren ondorioak.