Lan Ikuskaritzak behin betiko arrazoia eman dio SATSEri, eta Osakidetzari premiazko konponbideak eskatu dizkio Basurtuko erditze-zerbitzuan tenperatura altuak izateko arriskuari aurre egiteko

Bilbon, 2024ko maiatzaren 20an. Martxoan, SATSE Euskadi Erizaintza eta Fisioterapiaren Sindikatuak salaketa bat aurkeztu zuen Lan Ikuskaritzan, Basurtuko Ospitaleko erditze-eremuko muturreko bero-baldintza kezkagarriengatik. Zerbitzu honetan gomendatutako tenperaturak 25 gradutik gorakoa izan behar ez duen arren, 30 gradura arteko igoerak erregistratu dira, pazienteen eta profesionalen osasuna arriskuan jarriz.

Hori dela eta, SATSE Euskadiko delegatu sindikalek kezka adierazi zuten: "Gure eskakizunen ondorioz, Lan-Osasunak eta Lan Ikuskaritzak Osakidetzari eskatu zioten horretarako beharrezko neurriak har zitzala, baina, beste behin ere, Euskal Osasun Zerbitzuak alde batera utzi ditu bere profesionalen eta pazienteen beharrak, eta arrisku larrian jartzen jarraitzen du emaginak eta ospitaleratutako pertsonak". Osakidetzaren arabera, eraikin babestua denez, ezin dira zenbait obra egin, hala nola aire girotua instalatzea. Hala ere, SATSEren ustez, "badira beste aukera batzuk gelen barruko tenperatura kontrolatzeko, ospitaleko beste eremu batzuetan obrak egin baitira, eta uste dugu horiek aprobetxatu ahal izango zirela barrutik erditze-eremua isolatzeko".

SATSEren premiazko neurriak

Orain, Lan Ikuskaritzak arrazoia eman dio berriz ere SATSEri, eta Basurtuko Ospitaleari eskatu dio berehalako neurriak har ditzala erditzeen unitatean tenperatura altuak izateko arriskua saihesteko, uda baino lehen arazo hori konpontzeko premia azpimarratuz. Era berean, SATSEk Osakidetzari eskatzen dio muturreko bero-egoerak ez errepikatzeko beharrezko ekintza guztiak egin ditzala. "Ez dugu beste uda bat gehiago jasan nahi tenperatura altuekin, ospitaleratutako pertsonei eta emaginei eragingo diena", adierazi dute erizainen sindikatuak Bilboko Ospitalean dituen ordezkariek.

Era berean, arrisku-egoera horri erantzuteko, SATSEk Basurtuko Ospitaleko Segurtasun eta Osasun Batzordearen premiazko bilera eskatu du, eta Osakidetzako Segurtasun eta Osasun Korporatiboko Batzordeari ere jakinaraziko dio. Gainera, sindikatuak langileen eta pazienteen osasuna eta segurtasuna babesteko beharrezko lege-ekintza guztiak egingo ditu. Berehala, tenperatura- eta hezetasun-neurgailuak emango dizkie erditze-unitateko langileei, prebentzio-ordezkariari abisatzeko tenperatura maximoa gainditzen bada.

"Honaino iritsi gara, ez dugu onartuko Osakidetzak gure lankideen eta datozen hilabeteetan erditze-zerbitzua erabiltzen duten emakumeen osasuna arriskuan jartzen jarraitzea", amaitu dute SATSE Euskadiko sindikatuko ordezkariek.