SATSE Euskadik profesionalen osasun fisiko eta mentalari lehentasuna emango dion digitalizazio segurua aldarrikatzen du

Urrian egiten den Laneko Segurtasun eta Osasunerako Europako Astea funtsezko ekimena da kontzientziatzeko, jardunbide egokiak partekatzeko eta enpresak, langileak eta administrazioak lan-ingurune seguruagoetara eta osasungarriagoetara mobilizatzeko.

Edizio honek Laneko Segurtasun eta Osasunerako Europako Agentziaren (EU-OSHA) hiru urteko kanpaina (2023-2025) ixten du, «Lan seguru eta osasungarriak aro digitalean» lelopean. Ekimenak aukera ematen du digitalizazioak, osasun mentalak eta klima-aldaketak lantokietan sortzen ari diren erronkei aurre egiteko, prebentzio proaktiboaren eta langileen benetako parte-hartzearen alde eginez.

Digitalizazio osasungarri eta justu baten alde

Aurtengo kanpainak laneko osasun mentalean jartzen du arreta, estresa murrizten eta burnouta prebenitzen lagunduko duten elkarrizketarako eta laguntzarako espazioak bultzatuz; digitalizazioari lotutako arriskuen kudeaketan, arreta berezia jarriz telelanari lotutako arazo ergonomiko eta psikosozialei eta enplegu digitalerako modu berriei; eta lan-inguruneak klima-aldaketara egokitzean, gero eta muturrekoagoak diren ingurumen-baldintzen aurrean prebentzio-neurriak sustatuz.

Erantzun irmo eta koordinatuak behar dituzten erronkak dira lan-bizitzaren eta bizitza pertsonalaren arteko oreka, teknologiaren erabilera intentsibotik eratorritako tentsio fisiko eta mentalak, arrail digitala edo gizarte-isolamendua — kasu batzuetan klima-aldaketaren ondorioek larriagotu dezaketena —.

SATSE Euskaditik berretsi egiten du digitalizazio seguru, gizatiar eta jasangarriaren aldeko konpromisoa, osasun-profesionalen segurtasuna, osasuna eta ongizatea lehenetsiko dituena.

"Digitalizazioa ezinbesteko tresna da, baina baita arrisku-faktore berri bat ere, behar bezala kudeatzen ez bada. SATSEn lanean ari gara berrikuntza teknologikoa ez dadin izan zama mental, isolamendu edo prekarietate handiagoa, baizik eta profesionalentzako osasun, segurtasun eta bizi-kalitate handiagoa", adierazi du Mariví Mollinedo SATSE Euskadiko Lan Osasuneko arduradunak.

Digitalizazioak lanean zure osasunari eragiten diola uste baduzu, jarri harremanetan zure SATSEko ordezkariarekin. Zuri entzuteko, orientatzeko eta zure eskubideak defendatzeko gaude hemen.