SATSE Euskadik Gasteizko Txagorritxu egoitza publikoko gaueko txandan dagoen erizain eskasia salatu du

SATSE Euskadi Erizainen Sindikatuak urteak daramatza Gizarte Ongizaterako Foru Erakundearen Txagorritxuko adinekoen egoitzan erizain gutxi dagoela salatzen. Egiturazko gabezia horrek ondorio negatiboak dakarzkie bai egoiliarrei bai profesionalei; izan ere, asistentzia-gainkarga handiagoa da erizainek jasan beharko luketena baino, bereziki gaueko txandan.

Gasteizko egoitza publiko horretan, mendekotasun handia duten eta erizaintzako zainketa-kopuru handia behar duten pertsonak artatzen dira. Badira narriadura kognitiboa duten egoiliarrak, gaixotasun mentala dutenak edo desgaitasun intelektuala duten pertsona zahartuak. Gainera, ohikoa da etapa horretan egoiliarrek ohikoak baino zainketa gehiago behar dituzten osasun-arazoak izatea, hala nola gaixotasun akutuen prozesuetan, osasun-larrialdietan eta abarretan. Bestalde, bizitzaren amaierako etapa ere artatzen da, hala nola zainketa aringarriak, zainketa oso espezifikoak eta beharrezko eta giza denbora behar dutenak.

Egoiliarrak 6 modulutan daude, 3 solairutan banatuta, eta gaueko txandan erizain bakar batek artatu behar ditu 144 egoiliarrak. Lourdes Lopez de Munain SATSEko ordezkariak salatu duenez, "erizaintzako zainketa ugari behar dituzten pertsonak dira, eta horiek ezinbestekoak dira kalitatezko arreta soziosanitarioa izan dezaten. Hala ere, erizainek ezin dituzte zainketa guztiak bere gain hartu gaur egun dagoen erizain ratioa hobetzen ez bada”. Horrek eragin negatiboa du pertsona bakoitzari eman dakiokeen arretan, eta arriskuan jartzen du ustekaberen bat egonez gero.

2024ko martxoaren 1ean, Gorka Urtaran Gizarte Politiketako diputatuak jendaurrean aitortu zuen egoitzan dauden erizainak ez direla nahikoa, eta gaueko txanda indartuko zela. Berariaz aipatu zuen Txagorritxuko egoitzan gaueko txandan erizain bat gehiago behar zela.

Erizain taldeak ere urteak daramatza egoera honekin haserre. Erakundeak gaueko txandan beste erizain bat behar dela onartu arren, oraindik ez da irtenbiderik eman. Aspalditik dago irtenbide horren zain, eta GOFEk eta Arabako Foru Aldundiak ez dute erabaki konponbide hori hartzea.

Hori dela eta, SATE Euskadi Erizainen Sindikatuak laguntza ematen dio erizain-taldeari, administrazioak kalitatezko zaintza bermatu nahi ez duela salatuz. "Erakundeari eskatzen diogu berehala har ditzala beharrezko neurriak, plantilla handitzeko, Txagorritxuko egoitzako gaueko txandan erizain gehiago egon daitezen", amaitu du Lopez de Munainek.